2025-жылдын 20-сентябрында Пусан шаарында өтүп жаткан эл аралык кинофестивалдын алкагында Кыргызстандын улуттук киносуна арналган атайын стенд ишин баштады. Анда кыргыз киносунун тарыхы, бүгүнкү ийгиликтери жана келечектеги багыттары тууралуу маалымат сунушталып, чет элдик кинематографисттер менен кызматташууга жаңы мүмкүнчүлүктөр ачылды.

Кыргыз киносунун дүйнөлүк аренага чыгышы улуттук маданий мурастын таанылышына жана чыгармачылыктын жайылышына чоң салым кошууда. Фестивалдын алкагында өткөн Кино маркет ийгиликтүү болуп, кыргыз кино өкүлдөрү дүйнөлүк кино индустриясынын мыкты адистери жана продюсерлери менен жолугушууларды өткөрүштү. Эл аралык кызматташтык, биргелешкен долбоорлор жана жаңы мүмкүнчүлүктөр талкууланды.

Мындан тышкары, Кыргыз Республикасынын Кинематография департаментинин директору Улан Адамалиев Корея Республикасынын Маданият жана туризм министрлигине караштуу белгилүү KOFIC (Korean Film Council) уюмунун директору Han Sang Jun менен жолугушту. Тараптар төмөнкү багыттар боюнча кызматташууга макулдашышты:

1. Кыргызстан менен Түштүк Корея ортосунда копродукцияларды ишке ашыруу;
2. Жаш адистерди окутуу жана тажрыйба алмашуу программаларын уюштуруу;
3. Эки өлкөдө тең кино күндөрүн өткөрүү.

Кошумча түрдө, Кыргызстандын делегациясы Кореяда өткөн Азия кинокомиссиясынын жыйынына катышып, 2025-жылдагы отчёт жана 2026-жылга пландар талкууланды.

Бул маанилүү иш-чара кыргыз киносунун эл аралык таанылышын кеңейтип, жаңы долбоорлорду ишке ашырууга өбөлгө түзөт.

Эң чоң ийгиликке режиссёрлор Эрке Жумакматова менен Эмиль Атагельдиевдин «Курак» тасмасы жетишти. Фильм эки номинацияда жеңүүчү болду: «Бангладештин Июль мемориалдык сыйлыгы» жана Пусан эл аралык кинофестивалынын негиздөөчүсүнүн урматына Вьетнам Республикасы тарабынан уюштурулган «Ким Жисеок» («The Kim Jiseok Award») сыйлыгы.